بنگرد – چوارشەممە، ٢ی ئەیلولی ٢٠٢٦
هەڤاڵ حەیدەری ئاسایش، لێپرسراوی مەڵبەندی ٢٤ی ڕاپەڕین، لە چوارچێوەی بوژاندنەوە و پەرەپێدانی کاری ڕێکخراوەیی بۆ باشتر خزمەتکردنی دەڤەرەکە و کۆمەڵانی خەڵکە تێکۆشەرەکەی، لە میانی بەسەرکردنەوەی ناوەندی ڕێکخستنی بنگرددا، جەختی لە گرنگیی پتەوکردنی پەیوەندیی ئۆرگانەکانی یەکێتی نیشتمانیی کوردستان بە جەماوەر و جێبەجێکردنی دیسپلینە حزبییەکان کردەوە بۆ ڕاپەڕاندنی سەرکەوتوویانەی ئەرکەکانی قۆناغەکە.
لە بەسەرکردنەوەکەدا، کە ژمارەیەک لە هەڤاڵان، لێپرسراوانی بەشەکانی مەڵبەند و هەڤاڵ عەزیز ئەحمەد، لێپرسراوی ناوەندەکە ئامادەی بوون، هەڤاڵ لێپرسراوی مەڵبەند لە وتەیەکدا وێڕای پێزانین و دەستخۆشی بۆ کۆشش و ماندووبوونی هەڤاڵانی سنوورەکە، ڕایگەیاند: یەکێتی خۆی بە قەرزاری ئەم دەڤەرە تێکۆشەرە دەزانێت و ئەرکی سەرشانمانە بە دڵسۆزییەوە کار بکەین. مانەوە و هێزی ئێمە تەنها لە خزمەتکردنی بێ جیاوازیی کۆمەڵانی خەڵکدایە و پێویستە هەموومان بە ڕۆحیەتێکی یەکێتییانەوە و دوور لە بەرژەوەندیی تایبەت، نوێنەرایەتیی ڕاستەقینەی خەم و داواکارییەکانی خەڵکی ناوچەکە بکەین و متمانەی جەماوەر قووڵتر بکەینەوە.
