بافڵ جەلال تاڵەبانی سەرۆكی یەكێتیی نیشتمانیی كوردستان، لە یادی 63 ساڵەی دامەزراندنی یەكێتی مامۆستایانی كوردستاندا پەیامێكی بڵاوكردەوە و رایگەیاند: “پێگەی مامۆستایانی كوردستان بەرزدەنرخێنین كە لە هیچ دۆخێكدا نەیانهێشتووە پڕۆسەی پەروەردە و فێركردن پەكی بكەوێت، ئێمە پێزانینمان بۆ خزمەتە گەورەكانیان هەیە”.
دەقی پەیامەكە:
بەبۆنەی یادی 63 ساڵەی دامەزراندنی یەكێتیی مامۆستایانی كوردستانەوە پیرۆزبایی لە تەواوی مامۆستایانی سەربەرز و قەدرگرانی كوردستان دەكەم.
رۆڵ و پێگەی مامۆستایانی كوردستان لە تەواوی قۆناغە سەخت و دژوارەكاندا بەرزدەنرخێنین كە لە هیچ دۆخێكدا نەیانهێشتووە پڕۆسەی پەروەردە و فێركردن پەكی بكەوێت، سەرەڕای دۆخ و گوزەرانی خۆیان، ئێمە پێزانینمان بۆ خزمەتە گەورەكانیان هەیە.
مامۆستایانی بەڕێز وەك چۆن لە رابردوودا رۆڵی كاراتان لە پاراستنی شوناس و بەهاباڵاكانی كۆمەڵگەماندا گێڕاوە، هیوادارم لەم قۆناغەشدا بە سوود وەرگرتن لە پێشكەوتنەكانی سەردەم رێنیشاندەری رۆڵەكانی نیشتمانەكەمان بن تاوەكو داهێنەرتر و بەرهەمهێنەرتربن و لە داهاتوودا خزمەتی خەڵكە خۆشەویستەكەمان بكەن.
بافڵ جەلال تاڵەبانی
سەرۆكی یەكێتیی نیشتمانیی كوردستان
