کەمێک پێش ئێستا عەلی زەیدی راسپێردراو بۆ پێکهێنانی حکومەتی نوێی عیراق، گەیشتە فڕۆکەخانی نێودەوڵەتی جەلال تاڵەبانی لە سلێمانی و لەلایەن بافڵ جەلال تاڵەبانی سەرۆکی یەکێتیی نیشتمانیی کوردستانەوە پێشوازی لێکرا.
هاوکات لەلایەن هەڤاڵان قوباد تاڵەبانی و دەرباز کۆسرەت رەسوڵ و خالید شوانی و د.هەڤاڵ ئەبوبەکر پێشوازی لێکرا.
سەردانەکەی عەلی زەیدی راسپێردراو بۆ پێکهێنانی حکومەتی نوێی عیراق بۆ سلێمانی دوای ئەوە دێت، کە بەیانی ئەمڕۆ گەیشتبووە هەولێری پایتەختی هەرێمی کوردستان و پاش چەند کۆبوونەوەیەک دوانیوەڕۆی ئەمڕۆ گەیشتە سلێمانی.
لەبارەی سەردانەکەشەوە د.هەڤاڵ ئەبوبەکر پارێزگاری سلێمانی بۆ کەناڵەکانی راگەیاندن وتی: ئەم سەردانە گرنگییەکی زۆری هەیە، چونکە ئەو بارودۆخەی لەناوچەکە هەیە، کە تا رادەیەکی زۆر کاریگەری لەسەر عیراق دروستکردووە، پێویستە بۆ پێکهێنانی حکومەتی نوێی عیراق پەلە بکرێت.
راشیگەیاند: سەردانەکەی عەلی زەیدی بۆ سلێمانی بەمەبەستی کۆبوونەوەیە لەگەڵ لایەنەکاندا، تاوەکو بەرنامەیەکی هاوبەش دابنرێت بۆ پێکهێنانی حکومەت کە دواجار وەڵامدەرەوەی داخوازییەکانی هاووڵاتیان بێت.
