ئەمڕۆ ١٢ی حوزەیران، ساڵیادی لەدایکبوونی ژنە تێکۆشەر، پێشمەرگەی ڕۆژە سەختەکانی شۆڕشی نوێ و کەسایەتیی دیاری نیشتمانی، خاتوو (هێرۆ ئیبراهیم ئەحمەد)ە.
هێرۆخان، وەک پەروەردەی بیرمەند و سەرکردە (ئیبراهیم ئەحمەد) و هاوسەر و هاوڕێی تەمەنی سەرۆک (مام جەلال)، ڕۆڵێکی مێژوویی و حاشاهەڵنەگری لە بزووتنەوەی ڕزگاریخوازی گەلی کوردستاندا گێڕاوە. ئەو لە مێژووی خەباتی نەتەوەکەماندا تەنها وەک کچێک یان هاوسەری سەرکردەیەک نەناسراوە، بەڵکوو خۆی خاوەنی خەباتێکی گەورە و سەربەخۆیە:
لە شاخ و شۆڕشدا: پێشمەرگەیەکی ئازا و دۆکیومێنتکار و وێنەگری ساتە سەختەکانی شۆڕشی نوێ بوو، کە توانیی بە کامێراکەی دەنگی شۆڕش و خەباتی ڕەوای گەلەکەی و نەهامەتییەکان بخاتە بەردەم جیهان.
لە خزمەتی کۆمەڵگە و ئاوەدانیدا: دامەزرێنەر و خەمخۆری سەرەکیی ڕێکخراوی (منداڵپارێزی کوردستان) بووە، کە جێدەستی لە ژیان، پەروەردە و تەندروستیی هەزاران منداڵی کورددا دیارە.
لە بوارەکانی میدیا، هونەر و کەلتووردا: ڕۆڵێکی کاریگەری هەبووە لە بەرەوپێشبردنی میدیای کوردیدا و هەمیشە پاڵپشتێکی بەهێزی نووسەران، ڕووناکبیران و هونەرمەندان بووە بۆ پاراستنی شوناس و کەلتووری نەتەوەکەمان.
بۆ ئێمە لە مەڵبەندی ٢٤ی ڕاپەڕین، خەبات و تێکۆشانی (دادە هێرۆ) وانەیەکی گرنگی کۆڵنەدان و دڵسۆزییە بۆ ڕێبازی یەکێتیی نیشتمانیی کوردستان. ئەو سیمبولی ژنی کوردە، کە سەلماندی ژنان دەتوانن هەم لە بەرەکانی پێشەوەی خەباتی پێشمەرگایەتی و هەم لە پرۆسەی بونیادنانەوەی کۆمەڵگەی مەدەنیدا سەرکەوتووانە پێشەنگ بن.
لەم یادەدا، جوانترین پیرۆزبایی ئاراستەی هێرۆخان دەکەین و هیوای تەندروستییەکی باشی بۆ دەخوازین، جەخت لەسەر بەردەوامیدان بە ڕێبازی چەپکەگوڵەکەی سەرۆک مام جەلال و پاراستنی دەستکەوتە نیشتمانییەکان دەکەینەوە بۆ خزمەتکردنی زیاتری کۆمەڵانی خەڵکی کوردستان و دەڤەرەکەمان.
مەڵبەندی ٢٤ی ڕاپەڕین
١٢ی حوزەیرانی ٢٠٢٦
